ماذاعلمتك الدنيا؟؟

[مضاوي]

سؤال خطر في بالي و حبيت انكم تشاركوني في الاجابه عليه

مـــاذا علمــــــــــتك الدنــــيا؟

طبعا انا فريت على اهل البيت فردا فردا وسئلتهم السؤال نفسهم


اول شي نشدت جدتي رحت وقلت جده وش علمتس الدنيا>>>>لا تفوتكم اس>>> نهرج كل واحد بلهجته

قالتلي......يا بنيتي والله ما خلت عني شي الدنيا من انا صغيره حشى تبي تقصلي قصة حياتها
المهم اني غصب قعدت استمع لجدتي عشان اقدر استخلص وش تعلمت جدتي الله يخليها لنا من الدنيا
بصراحه الله يعينها عزرت فيها الدنيا لين قالت بس.........بس اهم شي انها طلعت بفايده
وهي الصبر
وان المعروف ما يضيع مع الرجال >>>>>تقصد رجال اول موب الحين
وان الحرمه>>>>>>>>>>ماني قايله عشان ما يتشمتون التماسيح :D

المهم خلصت من جدتي رحت على امي
وسالتها نفس السؤال
يمه وش علمتس الدنيا
قالت كلمتين: علمتني علمتني الصبر عليس من بد خواتس يوم شفت اجابت امي سذا انسحبت بهدوء وسكينه
ثم انطلقت للهدف اللي بعد وهي اختي اللي اصغر مني وقلت لها..
هيه انتي وش تعلمتي من الدنيا؟ عاينت في وقالت ما تعلمت شي.........وقعدت تضحك من غير سنون خخخخخخخخخخ قلتها في نفسي :cwm14:
اخر شي رحت لا اخر فرد في العائله وهي خالتي وقلت
طنط بالله بسئلس سؤال قالت انشدي ؛<<<<احلى ياطنط مدري كيف جت
قلت ما ذا علمتك الدنيا؟
قالت الدنيا كل ما عشتي فيها تعلمتي اكثر واكثر وحسب المرحله العمريه اللي وصلت لها علمتني
الصبر........وانه الصبر انواع صبر غصب على الانسان انه يصبره
وصبر يجبر الانسان نفسه على الصبر.ويكون الصبر في امور معينه وتكون با ارداته وقوة ايمانه
ثاني شي
كل مطرود ملحـــــــــــوق.....قلت يعني وشو ؟ قالت ماني معلمتس وابتسمت

المهم الحلقه طالت ولو قعدت انشد واستفسر ما خلصت ....

عاد الباقي عليكم انتم وتتمة الحلقه عليكم فلا تسفهون سؤالي واطالب جميع الاعضاء بالاجابه عليه حتى اقدر استفيد واخذ احتياطاتي من الدنيا قبل تمرمطني :cwm12:

مـــــــــــــــــــــــــــــاذا علمــــــــــــــــــــتك الــــــــــــــد نيا!!؟

[محمد بن جمشان]

عرفـت إن العرب تضحك على النكته ثلاث اشهور

وعرفـت إن العرب تبكي على الميّت ثلاث ايــام

هل هذا يكفي

[غــــــــيم]

اخر شي رحت لا اخر فرد في العائله وهي خالتي وقلت
طنط بالله بسئلس سؤال قالت انشدي ؛<<<<احلى ياطنط مدري كيف جت
قلت ما ذا علمتك الدنيا؟
قالت الدنيا كل ما عشتي فيها تعلمتي اكثر واكثر وحسب المرحله العمريه اللي وصلت لها علمتني
الصبر........وانه الصبر انواع صبر غصب على الانسان انه يصبره
وصبر يجبر الانسان نفسه على الصبر.ويكون الصبر في امور معينه وتكون با ارداته وقوة ايمانه
ثاني شي
كل مطرود ملحـــــــــــوق.....قلت يعني وشو ؟ قالت ماني معلمتس وابتسمت

فيه شي ثاني نسيته الصبر على لقافتك

؟


يعطيك العافيه قلبي

[رائحة المدينة]

احبب حبيبك هوناً ما ؛ عسى ان يكون بغبضك يوماً ما
وابغض بغيضك هوناً ما ؛عسى ان يكون حبيبك يوماً ما

[احساس]

((تبي تستريح
لاتفهم الدنيا خطأ..ولاتفهم الدنيا صحيح))

للكاتب الرائع الرطيان